Korallbruni

Forlagið Eksil hevur givið út yrkingasavnið: “Korallbruni” eftir Onnu Maluna Jógvansdóttur. Hetta er annað yrkingasavn hennara. Anna Malan gongur í løtuni á Rithøvundaskúlanum í Keypmannahavn. Í 2016 læt Mentamálaráðið henni Virðisløn til ungt listafólk. Yrkingasavn hennara ber dám av dýpd og estetiskum fínleika, har menniskjað og havið treyta hvørt annað og renna saman í eina lívgevandi ringrás.

 

Korallbruni er annað savnið hjá Onnu Maluni Jógvansdóttur. Í 2015 kom út yrkingasavnið Undirfloyma, ið hon listprýddi sjálv. Hesaferð hevur hon eisini myndprýtt savnið Korallbruni, m.a. við tara, sum hon hevur funnið í Nólsoy.

 

Høvundin sigur, at savnið er ein roynd at skriva seg burtur frá menniskjanum og út í náttúruna. Her arbeiðir Anna Malan út frá einum sokallaðum posthumanum og náttúruheimspekistýrdum ráki, ið stendur sterkt innan list og skaldskap í Norðurlondum í hesum døgum. Savnið fær lesaran at endurhugsa sína støðu í heiminum, har tað materiella ikki bert er deytt og óvirkið, men ein partur av okkum sjálvum og øllum uttan um okkum.

 

Eitt brot í yrkingasavninum á s. 41, lýsir væl umskapan menniskjans til part av lívskringinum í sjónum:

úr grótinum

mínar brúnligu greinar

fløða í vatninum

snara í aldututli

lítlar bløðrur

á endanum

flóta kynsbúnar

fyltar av eggum og sáði

mítt spírandi slim

av taranýføðingi

skapast

í døkku lívmóðrini

 

seigliga vaksi eg til taraskóg